گال میں ڈومنی نے سری لنکن بولرز کو بے حال کردیا

 

گال ٹیسٹ: جنوبی افریقی بیٹسمین ڈومنی شاٹ کھیل رہے ہیں، انھوں نے ناقابل شکست 100 رنز بنائے۔ فوٹو: اے ایف پی

گال: گال ٹیسٹ میں پال ڈومنی نے سری لنکن بولرز کو بے حال کر دیا، انھوں نے شاندار بیٹنگ کا مظاہرہ کرتے ہوئے ناقابل شکست سنچری جڑی۔

جنوبی افریقہ نے 455 رنز 9 وکٹ پر اننگزڈیکلیئرڈ کی، کونٹین ڈی کاک بھی ففٹی اسکور کرنے میں کامیاب رہے، دلروان پریرا نے 4 اور سورنگا لکمل نے تین وکٹیں لیں، میزبان نے جواب میں بغیر وکٹ کھوئے30 رنز بنالیے۔

تفصیلات کے مطابق جنوبی افریقہ نے دوسرے دن کھیل کا آغاز268 رنز پانچ وکٹ سے کیا، پہلا سیشن نوجوان بیٹسمین ڈی کاک کے نام رہا جنھوں نے کیریئر کے دوسرے ٹیسٹ میں اولین ففٹی اسکور کی، انھوں نے 90 بالز پر 6 چوکوں کی مدد سے 50 رنز بنائے، انھیں دلروان پریرا نے اپنی ٹرننگ ڈلیوری پر قابو کیا، گیند بیٹ کا کنارہ چھوتی ہوئی مہیلا جے وردنے کے ہاتھوں میں سما گئی، یہ ان کا 198 واں ٹیسٹ کیچ تھا۔ نائٹ واچ مین ڈیل اسٹین (3) پہلے ہی لکمل کی گیند پر بولڈ ہوکر پویلین واپس لوٹ گئے تھے، جب لیفٹ ہینڈر پال ڈومنی کریز پر آئے تو اس وقت جنوبی افریقہ کی331 رنز پر 7 وکٹیں گرچکی تھیں تاہم انھوں نے انتہائی دبائوکے باوجود عمدہ بیٹنگ کا مظاہرہ کیا۔

جب ڈومنی نے ٹیم کا مجموعہ 400 تک پہنچایا تو سری لنکن سائیڈ کی فرسٹریشن آسمان کو چھونے لگی، گذشتہ روز ہاتھ زخمی کرانے والے شمندا ایرنگا بدستور فیلڈ سے باہر رہے، ڈومنی کا 82 رنز پر دلروان پریرا نے کیچ ڈراپ کیا، جب انھوں نے چوتھی سنچری مکمل کی تو ڈریسنگ روم میں ساتھی کھلاڑیوں نے کھڑے ہوکر انھیں مبارکباد دی۔

اس دوران فلینڈر 27 رنز بناکر میتھیوز کی گیند پر ایل بی ڈبلیو ہوئے ، انھوں نے فیصلے کو چیلنج کیا مگر کوئی فائدہ نہیں ہوا، فلینڈر نے ڈومنی کے ساتھ آٹھویں وکٹ کی شراکت میں 75 رنز جوڑے، جب مورن مورکل 22 رنز پر پریرا کی وکٹ بنے تو نئے کپتان ہاشم آملا نے 455 رنز 9 وکٹ پر اننگز ڈیکلیئرڈ کردی، پال ڈومنی 100 رنز پر ناٹ آئوٹ رہے۔ 

دوسرے دن کھیل کے اختتام تک سری لنکا نے بغیر کسی نقصان کے 30 رنز بنائے، 6 برس بعد ٹیسٹ کرکٹ میں واپس آنے والے اپل تھارنگا 20 اور کوشل سلوا 8 رنز پر کھیل رہے تھے۔