ملائیشین طیارے کی تباہی کے ذمہ دار ولادی میر پیوٹن ہیں: باراک اوباما

 

 

واشنگٹن(مانیٹرنگ ڈیسک ) امریکی صدر باراک اوباما کا کہنا ہے کہ یوکرین کے سرحدی علاقے میں گرنے والے ملائیشین طیارے کو روس نواز باغیوں نے نشانہ بنایا اور اس کے ذمہ دار روسی صدر ولادی میر پیوٹن ہیں۔

وائٹ ہاﺅس میں پریس کانفرنس کر تے ہوئے امریکی صدر کا کہنا تھا کہ ملائیشین طیارے کو روس نواز باغیوں کے کنٹرول والے علاقے سے نشانہ بنایا گیا لہذاہم کہہ سکتے ہیں کہ اسے روس نوازباغیوں نے نشانہ بنایا اور ان کےلئے یہ تب تک ممکن نہیں ہو سکتا تھا جب تک روس کی جانب سے انکی مدد نہ کی جائے۔

 انہوں نے کہا کہ دنیا میں 30 ہزار فٹ کی بلندی پر پرواز کرنے والے طیارے کو نشانہ بنانے کی صلاحیت رکھنے والے میزائل بہت کم ہیں ، واقعے کی ابتدائی تحقیقات سے پتا چلتا ہے کہ طیارے کو روسی ساختہ میزائل سے نشانہ بنایا گیا۔

باراک اوباما نے عالمی برادری پر زور دیا کہ وہ روس پر دباﺅ ڈالے کہ وہ باغیوں کو جنگی بندی پر آمادہ کرنے کےساتھ طیارہ گرنے کی جگہ تک رسائی دے تاکہ تحقیقات کے بعد واقعے کی اصل وجوہات سامنے آسکیں۔ 

اوباما کا کہنا تھا کہ یوکرینی سرحد میں پیش آنےوالے افسوسناک واقعے سے سب کو یہ پیغام لینا چاہئے کہ یوکرین کے موجودہ حالات کسی کےلئے بھی فائدہ مند نہیں ہیں اور یورپی ممالک کے لئے روس سے اپنے تعلقات پر نظر ثانی کرنے کا سنہری موقع ہے ۔

اس سے قبل امریکی حکام نے اقوام متحدہ کی سیکیورٹی کونسل کو واقعے کے حوالے سے آگاہ کرتے ہوئے بتایا کہ ملائیشین طیارے کو ممکنہ طور پر ایس اے 11 میزائل سے نشانہ بنایا گیا جو یوکرین کے مشرقی علاقوں میں روس نواز باغیوں کے زیر استعمال ہے۔